'कोलकी'

दिन बादर के बनइया,
सुघर सावन के बरसइया,
बुन्द बुन्द म उही हर समाये हे,
जेन तोला अउ मोला बनाये हे।

पाना पतेवना म उहीच बसे हे,
चंदा अउ सुरूज ल जउन रचे हे।
हवा पानी के एक उही हे विधाता,
जनम जनम जेखरले हमर नाता।
संसा के सुतरी म उहीच गुथाये हे।।बुन्द बुन्द म।।

भोंभरा अउ जाड़ के पगरइती करथे,
लेवत साठ नाम दूख पीरा ल हरथे।
जेखर परसादे हमन जीथन खाथन,
सुत उठके नव नव माथ नवाथन।
बाहिर ठाढ़े हे उहीच भितरी धंधाये हे।।बुन्द बुन्द म।।

अगम लहरा ले बड़े लाहर देखाथे,
बखत परे म हमला सौंहत चेताथे।
समझे के बात ये झन होवव हैरानी,
का बिसात जीनगी के पल भर जवानी।
अंजोर उही उहीच अंधयारी बगराये हे।।बुन्द बुन्द म।।

चाल के चलवंता तोरो नई चलय,
ओखर आगू म ककरो नई गलय।
कतको उदिम करले बोचक नइ पाबे,
दूसर बर खांचा खनबे तही भोसाबे।
बड़े बड़े शूरमा अइसने मुंहके खाये हे।।बुन्द बुन्द म।।

जग जंवारा मया चिटिक मीठ बोल,
खाले कमाले जीनगी जीले अनमोल।
करले बंदगी धरले नरियर सुपारी,
एक न एकदिन आही हमरो पारी।
पिछोत के रद्दा सतगुरू बताये हे।। बुन्द बुन्द म।।

गीतकार
एमन दास मानिकपुरी 
औंरी, भिलाई 3, दुरूग।
मो. 7828953811

"अनबोलना"

कइसे गावंव सखी रे मन गीत,
अनबोलना होगे हे सावंरिया।

मोहना मयारू बर लिपे पोते अंगना।
लांघन भुखन जोहे करधनिया कंगना।
कलपथे कक​नी बनुरिया,
अनबोलना होगे हे सावंरिया।

बोले न बताये पैरी बैरी होगे बिछिया।
तरस तरस जाये झुमका देथे खिसिया।
हालय न डोलय नथनिया,
अनबोलना होगे हे सावंरिया।

महर महके खोपा के खोंचे दौनापान।
अइलावत जोहे अबले झन हो हिनमान।
किरिया हे मोला करिया,
अनबोलना होगे हे सावंरिया।

रूख राई जंगल झाड़ी पुछथे उदास।
सुरता संसो म तरिया मरथे पीयास। 
झुखागे नरवा झिरिया,
अनबोलना होगे हे सावंरिया।

लुगा के आंछी म अइसे गठिया लेतेंव।
मनभर धनी संग मोर बतिया लेतेंव।
नई चाही महल अ​टरिया,
अनबोलना होगे हे सावंरिया।

गीतकार 
एमन दास मानिकपुरी 
औंरी, भिलाई 3, दुरूग
मो.7828953811

'लगुन लहरा'

दरस बिन बैहा रे,
तरसे मोर नैना रे,
आस के सावन घुमरे अंतस म घनघोर।
बनके बदरी बरसजा तय आजा धनी मोर।

अमरैया म डेरा डारे,
कारी जउंहर खोपा पारे,
पाना पतेवना अस अपन तन ल झन टोर।
मय आहूं बेरा टार के संगी थोरकन अगोर।

दाउ परचंडा अभी गे हवय खार म,
माई मुसहा मंडल घुमथे कछार म।
दोगला मन टुकुर देखत रहिथै रनछोर।
बनके बदरी बरसजा तय आजा धनी मोर।

पीरा ल मनके तोर जान डारे हंव,
भरे पिरित जउंरिया पहिचान डारे हंव।
सुध सवांगा साधे जोहत रहिबे रद्दा मोर।
मय आहूं बेरा टार के संगी थोरकन अगोर।

सुरर सुरर पुरवाही,
पवन हिंडोलना।
हांसी ठ्टठा म झन,
होबे अनबोलना।
नरवा के पानी,
दिखथे फरिहर।
झुंझकुर मयारूक,
बदेहंव नरियर।
मंगनी मया के,
संगवारी चिन्हौर।
बारके दिया,
सोंपा लेतेंन मौर।
बइला गाड़ी म चढ़के,
सज अउ संवर के,
धरके ब​रतिया तंय आ जाबे रे दोस,,,

अलिन गलिन म,
तोरेच चरचा।
लिख लिख भेजेंव,
मया म परचा।
मइके ससुरे के,
झन हो हिनमान।
अतकेच गठियाले,
खवाहूं बीरो पान।
जीनगी जनम के,
हमर नाता।
मोरेच बर तोला,
गढ़े विधाता।
बइला गाड़ी म चढ़के,
सज अउ संवर के,
धरके बरतिया मंय आ जाहूं रे दोस,,,

गीतकार
एमन दास मानिकपुरी
औंरी, भिलाई 3, दुरूग।
मो.7828953811

येद मया तोर

तोर बिना चिटको मन रही नई पावत हे,
येद मया तोर मोला कतका तरसावत हे।

गुरतुरहा मिठ बोली रंगरेली गतबानी,
कुंवर कुंवर हाथ पांव छछलत जवानी।
मंद मतौना आंखी नजर भरमावत हे।।येद मया तोर।।

मनमेाहनी रूप सरर बरर सांगर मोंगर,
करमा के ताल मया बिधुन बाजे मांदर।
ऐसन बेलबेलही मोला कुलकावत हे।। येद मया तोर।।

निचट निक नखरा तोर हांसी बोली बतरा,
लाज लहर सिंगार गल हार पिरित पतरा।
पलकन घुंघटा बड़ा चुलकावत हे।। येद मया तोर।।

हिरदे निर्मल ​काया घन मोटियारी आसा,
झुली झुली रेंगना कोयली कुहकी भाखा।
गाल गोदना डोहड़ी सैता डोलावत हे।। येद मया तोर।।

बेनी गांथे फुलवा मार महकत पुरवैया,
लचलचहा कनिहा चाल चहकत अमरैया।
गउंकी आंखी आंखीच म समावत हे ।। येद मया तोर।।

गीतकार 
एमन दास मानिकपुरी
औंरी, भिलाई 3, दुरूग।
मो.7828953811

'देखे हंव'

चुल्हा म माढ़े अंगाकर रोटी ल जरत देखे हंव,
मय तो आंसू संग म करेजा चुरत देखे हंव।

कठलत हांसी के पांख धरे कभू उड़य अगास म,
उही मन ल मसोच के एक दिन मरत देखे हंव।

हरदी सही कुचरात रहीगे आस बिसवास के डोरी,
ऐसे बंधना मया के भपका बरत देखे हंव।

कसकत आंखी म अतेक बर सपना समोख डारेव,
हस्ती र​हीके काबर परस्ती रहत देखे हंव।

मन धुंका संग पिरित बोहागे ओरवाती के धार,
बिन ओधा झीपार जीनगी बहत देखे हंव।

सग बाप ल नौकर बतैया मतलबिया मनखे,
अउ बखत परे गदहा ल बाप कहत देखे हंव।

देखत देखत आंखी म घन अंधियारी छा गे,
इही अंधियारी ले एक सुरूज उवत देखे हंव।

गीतकार 
एमन दास मानिकपुरी
औंरी, भिलाई 3, दुरूग 
मो. 7828953811