बुधवार, 23 जुलाई 2014

'मोचो मोचो'

जेती देखौं तेती भईगे,
दिखथे भाईगे लाल सलाम। 
मरके घलो सरग नई दिखे,
दिखथे भईगे लाल सलाम।

काकर बर मय गाना गावंव,
काकर बर अब लिखंव गीत।
राजनीत के चौपट पासा म,
काकर हार अउ काकर जीत।

कलम कभू कलंक होथे?
लिखथे भईगे लाल सलाम।

तय जा मय आथंव जा जा,
संगे मरबोन ओसरी पारी।
बीता भर पेट के खातिर,
लइकुसहा होगे बन्दूक धारी।

हक बिरता के नारा धरके,
छाती चढ़गे लाल सलाम।

कोलिहा मन सब बघवा होगे,
जब नेता बनगे बेपारी।
थुंक चटैया पिछलग्गू चम्मच,
डंकरत भुंकरत हे अधिकारी।

किसानी बर लहू बोहागे,
धरती भईगे लाल सलाम।


गोड़तरिया इज्जत रौंदागे,
मुड़सरिया चपकागे नोट।
बयान बाजी म बेरा पहागे।
खपगे जिनगी बीतगे गोठ।

तइहा बर बइहा बानी हम,
लइहा भईगे लाल सलाम।

मुंह चपकागे खा पी खाके,
चापलुस के वकालत म।
प्रजातंंत्र सूली चढगिन जब,
यहा दरबारी हालत म।

सुरता भईगे सुख सुमत के,
बिरता भईगे लाल सलाम।

सरग सपना समोखे ठाढ़े,
कमिया नरक ल भोगत हे।
कपटी बैठे मुढ़ी म हमरे,
को जनी का का जोंगत हे?

पुरखा पुरबल के आजादी,
आबादी भईगे लाल सलाम।

बइठे बइठे पांगुर भांजत,
लबरा चांदी काटत हे।
महल अटारी चढ़के दोगला,
भाई भाई ल बांटत हे।

भुंईया के भगवान ठठागे,
ठउका भईगे लाल सलाम।

महतारी बर कोख कपूत के,
पीरा घलोक भारी होगे।
स्वारथ के खातिर दुनिया म,
आंखी देखे लबारी होगे।

चिरहा लंगोटी तक लुलवागे,
आंखी गढ़गे लाल सलाम।

जोग भोग ल छोड़के कवि रे,
लिखो अब ये बानी ल।
रत्नगर्भ म बारूद बिछगे,
गढ़ छत्तीस के जवानी ल।

परन करैया पर के बुध म!
पर के भईगे लाल सलाम।

गीतकार 
एमन दास मानिकपुरी
औंरी, भिलाई3, ​जिला—दुरूग
मो.7828953811


शुक्रवार, 20 जून 2014

'मया के चक्कर'


काला बतांव कइसे जियके काल होगे रे,
येद मया के चक्कर म बाराहाल होगे रे।

जनम झन गंवाए कहिेके,
धरम म धियान लगाएंव।
घन मोटियारी आसा मन म,
अटल सोहागिन पाएंव।
मड़वा के पिंयर हरदी पानी लाल होेगे रे,
येद मया के चक्कर म बाराहाल होगे रे।

अंतस म पीरा समागे,
हीरा बासत बासत।
अबिरथा जिनगी बिरथा होगे,
येद रोवत गावत हांसत।
मिठ बोली सतवंतिन के सवाल होगे रे,
येद मया के चक्कर म बारहाल होगे रे।

घर कुरिया परवा छानी,
का धरती आकाशा।
का बहिरासू म हारेंव,
जाने कोन जनम के पासा।
बिच्छल जवानी केे बिच्छल चाल होगे रे,
येद मया के चक्कर म बाराहाल होगे रे।

आंधी बड़ोरा मन ह होगे,
उड़ उड़ ठगे दिन राती।
चंदा सुरूज के हाही समागे,
सुरता जरय बिन तेल बाती।
तुलसी के चौंरा दियना जंजाल होगे रे,
येद मया के चक्कर म बाराहाल होगे रे।

गीतकार 
एमन दास मानिकपुरी 'अंजोर'
औंरी, भिलाई 3, जिला दुरूग।
मो.7828953811

बुधवार, 18 जून 2014

'नखरेली'


तय तो मोला छोड़ देहस,
त सुरता म काबर आथस।
मोर कलपना ल नई जानेस,
त अउ काबर कलपाथस।

अलबोलनी अस बोलस नहीं,
रही रही मन ल तरसाथस।
आवत जावत अलिन गलिन,
बिन बात मोला भरमाथस।

तय का समझे मोला रे बैरी,
जेमा नखरा अतेक देखाथस।
फोकट तोर बर हांसी बितायेंव,
तेमा फोकटे फोकट रोवाथस।

निरमोही अस पथरा होगेस,
त अब काबर पछताथस।
मुंह अखरा तोर बोली बतरा,
बानी वाली अस डराथस।

मया ले लहरा म मोला बोरेस,
अउ अपने अपन रिसाथस।
संगे रसता रेंगबो कहिके,
घेरी बेरी काबर पछुवाथस।

तोर बिना सुन्ना मोर जिनगी,
तेमा आगी काबर लगाथस।
किरिया खवाके मोला रे बैरी,
तिर म बलाके दुरिहाथस।

पिरित के का चिन्हारी हवय,
तेमा काला तय चिन्हाथस
जनम जनम के ये रिस्ता,
गउ बिरथ दाग लगाथस।

गीतकार 
एमन दास मानिकपुरी
औंरी, भिलाई3, जिला दुरूग।
मो.7828953811





सोमवार, 26 मई 2014

'कोलकी'

दिन बादर के बनइया,
सुघर सावन के बरसइया,
बुन्द बुन्द म उही हर समाये हे,
जेन तोला अउ मोला बनाये हे।

पाना पतेवना म उहीच बसे हे,
चंदा अउ सुरूज ल जउन रचे हे।
हवा पानी के एक उही हे विधाता,
जनम जनम जेखरले हमर नाता।
संसा के सुतरी म उहीच गुथाये हे।।बुन्द बुन्द म।।

भोंभरा अउ जाड़ के पगरइती करथे,
लेवत साठ नाम दूख पीरा ल हरथे।
जेखर परसादे हमन जीथन खाथन,
सुत उठके नव नव माथ नवाथन।
बाहिर ठाढ़े हे उहीच भितरी धंधाये हे।।बुन्द बुन्द म।।

अगम लहरा ले बड़े लाहर देखाथे,
बखत परे म हमला सौंहत चेताथे।
समझे के बात ये झन होवव हैरानी,
का बिसात जीनगी के पल भर जवानी।
अंजोर उही उहीच अंधयारी बगराये हे।।बुन्द बुन्द म।।

चाल के चलवंता तोरो नई चलय,
ओखर आगू म ककरो नई गलय।
कतको उदिम करले बोचक नइ पाबे,
दूसर बर खांचा खनबे तही भोसाबे।
बड़े बड़े शूरमा अइसने मुंहके खाये हे।।बुन्द बुन्द म।।

जग जंवारा मया चिटिक मीठ बोल,
खाले कमाले जीनगी जीले अनमोल।
करले बंदगी धरले नरियर सुपारी,
एक न एकदिन आही हमरो पारी।
पिछोत के रद्दा सतगुरू बताये हे।। बुन्द बुन्द म।।

गीतकार
एमन दास मानिकपुरी 
औंरी, भिलाई 3, दुरूग।
मो. 7828953811


रविवार, 11 मई 2014

"अनबोलना"



कइसे गावंव सखी रे मन गीत,
अनबोलना होगे हे सावंरिया।

मोहना मयारू बर लिपे पोते अंगना।
लांघन भुखन जोहे करधनिया कंगना।
कलपथे कक​नी बनुरिया,
अनबोलना होगे हे सावंरिया।

बोले न बताये पैरी बैरी होगे बिछिया।
तरस तरस जाये झुमका देथे खिसिया।
हालय न डोलय नथनिया,
अनबोलना होगे हे सावंरिया।

महर महके खोपा के खोंचे दौनापान।
अइलावत जोहे अबले झन हो हिनमान।
किरिया हे मोला करिया,
अनबोलना होगे हे सावंरिया।

रूख राई जंगल झाड़ी पुछथे उदास।
सुरता संसो म तरिया मरथे पीयास। 
झुखागे नरवा झिरिया,
अनबोलना होगे हे सावंरिया।

लुगा के आंछी म अइसे गठिया लेतेंव।
मनभर धनी संग मोर बतिया लेतेंव।
नई चाही महल अ​टरिया,
अनबोलना होगे हे सावंरिया।

गीतकार 
एमन दास मानिकपुरी 
औंरी, भिलाई 3, दुरूग
मो.7828953811

शनिवार, 3 मई 2014

'लगुन लहरा'


दरस बिन बैहा रे,
तरसे मोर नैना रे,
आस के सावन घुमरे अंतस म घनघोर।
बनके बदरी बरसजा तय आजा धनी मोर।

अमरैया म डेरा डारे,
कारी जउंहर खोपा पारे,
पाना पतेवना अस अपन तन ल झन टोर।
मय आहूं बेरा टार के संगी थोरकन अगोर।

दाउ परचंडा अभी गे हवय खार म,
माई मुसहा मंडल घुमथे कछार म।
दोगला मन टुकुर देखत रहिथै रनछोर।
बनके बदरी बरसजा तय आजा धनी मोर।

पीरा ल मनके तोर जान डारे हंव,
भरे पिरित जउंरिया पहिचान डारे हंव।
सुध सवांगा साधे जोहत रहिबे रद्दा मोर।
मय आहूं बेरा टार के संगी थोरकन अगोर।

सुरर सुरर पुरवाही,
पवन हिंडोलना।
हांसी ठ्टठा म झन,
होबे अनबोलना।
नरवा के पानी,
दिखथे फरिहर।
झुंझकुर मयारूक,
बदेहंव नरियर।
मंगनी मया के,
संगवारी चिन्हौर।
बारके दिया,
सोंपा लेतेंन मौर।
बइला गाड़ी म चढ़के,
सज अउ संवर के,
धरके ब​रतिया तंय आ जाबे रे दोस,,,

अलिन गलिन म,
तोरेच चरचा।
लिख लिख भेजेंव,
मया म परचा।
मइके ससुरे के,
झन हो हिनमान।
अतकेच गठियाले,
खवाहूं बीरो पान।
जीनगी जनम के,
हमर नाता।
मोरेच बर तोला,
गढ़े विधाता।
बइला गाड़ी म चढ़के,
सज अउ संवर के,
धरके बरतिया मंय आ जाहूं रे दोस,,,

गीतकार
एमन दास मानिकपुरी
औंरी, भिलाई 3, दुरूग।
मो.7828953811





















येद मया तोर



तोर बिना चिटको मन रही नई पावत हे,
येद मया तोर मोला कतका तरसावत हे।

गुरतुरहा मिठ बोली रंगरेली गतबानी,
कुंवर कुंवर हाथ पांव छछलत जवानी।
मंद मतौना आंखी नजर भरमावत हे।।येद मया तोर।।

मनमेाहनी रूप सरर बरर सांगर मोंगर,
करमा के ताल मया बिधुन बाजे मांदर।
ऐसन बेलबेलही मोला कुलकावत हे।। येद मया तोर।।

निचट निक नखरा तोर हांसी बोली बतरा,
लाज लहर सिंगार गल हार पिरित पतरा।
पलकन घुंघटा बड़ा चुलकावत हे।। येद मया तोर।।

हिरदे निर्मल ​काया घन मोटियारी आसा,
झुली झुली रेंगना कोयली कुहकी भाखा।
गाल गोदना डोहड़ी सैता डोलावत हे।। येद मया तोर।।

बेनी गांथे फुलवा मार महकत पुरवैया,
लचलचहा कनिहा चाल चहकत अमरैया।
गउंकी आंखी आंखीच म समावत हे ।। येद मया तोर।।

गीतकार 
एमन दास मानिकपुरी
औंरी, भिलाई 3, दुरूग।
मो.7828953811