सोमवार, 18 नवंबर 2019

हो रे मास, अघहन मास!

हो रे मास, 
अघहन मास!

जाड़ धर के आथस,
बिकट सोर मचाथस।
कोइ ल चुलकाथस,
कोइ ल कुलकाथस। 

महर महर धनिया,
महके खार—खार म।
सरर सरर पुरवइया,
डोंगरी पहार म।

जुड़ जुड़ नरवा तरिया,
हाथ गोड़ ठुनठुनी धरे।
जुड़ जुड़ कोठा कुरिया,
लंघियावत बस्ती सोवा परे।

मुंह डहर भगभग ले,
कुहरा ओगरत हे।
येदे चटकत हे गाल,
अउ होठ ओदरत हे।

गरम गरम फरा,
अउ चाउंर के चीला।
बंगाला के चटनी,
झड़कत हे मइपिला।

दूरिहा ले रेंग गोइ,
झन जोर तय बैंहा।
जुड़ेच जुड़ लागे,
रूख—रइ के छैंहा।

लजा के चंदा
चंदैनी खुसरत हे
जुड़ जड़काला म
सूरूज ठुठरत हे

गीतकार—
एमन दास मानिकपुरी 'अंजोर'
ग्राम व पोस्ट— औंरी,
तहसील— पाटन
जिला— दुर्ग, छ.ग.



















‘‘धान’’

‘‘धान’’
धान ह लुवा गे,
भारा ह बंधा गे।
बड़े बिहनिया ले,
गाड़ा ह फंदा गे।

बियारा म आ गे,
खरही ह गंजा गे।
दौरी ह गिंजरा गे,
धान ह मिंजा गे।

ओसा गे धूंका गे,
रास ह बंधा गे।
बिजहा बर अलगा गे,
कोठी म धरा गे।

गाड़ी म जोरा गे।
सोसायटी म उलदा गे,
करजा ह छूटा गे,
खुशहाली ह छा गे।



गीतकार—
एमन दास मानिकपुरी 'अंजोर'
ग्राम व पोस्ट-औंरी,
तहसील- पाटन,
जिला-दुर्ग, छत्तीसगढ़

































सोमवार, 11 नवंबर 2019

अरकट्टा

दुनिया दुख के मेला रे मोर भाई
पल छिन बिकट झमेला!

धन दोगानी खटिया गोरसी,
जियत भर के साथी।
चोंगी माखुर म बितगे जिनगी,
टोटा म लग गे फांसी।
बीता बर पेट के ख़ातिर,
गजब फिरेव सुछेल्ला रे मोर भाई
पल छिन,,,,,

तिनका जोर महल बनाएंव,
जोरेव पथरा ढेला।
स्वारथ के सूली म चढ़के,
खोजेव सुख के ठेला।
आंखी मुंदे रेंगेव रसता,
बैहा बरोबर अकेल्ला रे मोर भाई
पल छिन,,,,,

जांगर के राहत भर ले,
खूब उड़ाएव गुलछर्रा।
छाती उपर पीरा चढ़गे,
सब धुकय सुपा पर्रा।
तन पिंजरा के मैना उड़ागे,
जाने कहाँ सनकेरहा रे मोर भाई
पल छिन,,,,,

लेखा जोखा ये जिनगी के,
अतके मोर किताब।
सब खैता होना हे एक दिन,
काला रखव हिसाब।
माटी के काया माटी होही
लगे हे रेलम पेला रे मोर भाई
पल छिन,,,,,

गीतकार-एमन दास मानिकपुरी
मो-7828953811

मंगलवार, 24 सितंबर 2019

बीत्ता भर पेट के ख़ातिर,
गढ़े हे तोला भगवान रे,,
हाय ग अनियमित कर्मचारी,
तोर कतका करौ बखान रे,,

छंटनी के फांदा मा फसगे,
तोर सरी जिनगानी।
डौकी लैका भूखो मरगे,
विधि के दैखौ बैमानी।
छाती उप्पर करजा चढ़गे,
पेट म भूत मसान रे,
हाय ग अनियमित कर्मचारी,
तोर कतका करौ बखान रे,

तोरे कमाई म सबो भुंकरत हे,
तैं कमा कमा के हकर गे।
तोर भाग म संसो फिकर हे,
सब खा खा के डकर गे।
कोढ़िया मन के महल अटारी,
तैं सौंउहत होगे कंगाल रे,
हाय ग अनियमित कर्मचारी,
तोर कतका करौ बखान रे,

बपुरा बने म देखो तो,
काम सबो बिगड़त हे।
रावा भिया खांव खांव म,
हमला सबो रगड़त हे।
जागव रे रणचंडी पूत मन,
अब जांगर के दव बलिदान रे,
हाय ग अनियमित कर्मचारी,
तोर कतका करौ बखान रे,

सुने गुने के मौका नैहे,
मुंह देखना अनदेखनी बात।
आज गरीब के पेट मुंह म,
लौठी गोली कौरा भात।
जांगर टाठ करे बर परही,
तब होही नवा बिहान रे,
हाय ग अनियमित कर्मचारी,
तोर कतका करौ बखान रे,

मरके घलो सरग नै पायेन,
मिहनत करके मरगेन जी।
गजब गरु गरीबी हाय रे,
भरे जवानी सरगेन जी।
जूझत भर ले जूझना हे,
तंह अंत निकलय परान रे,
हाय ग अनियमित कर्मचारी,
तोर कतका करौ बखान रे,

गीतकार - एमन दास मानिकपुरी


शुक्रवार, 6 सितंबर 2019

सभी इसरो टीम को सादर नमन
-------------------------------------
कतको आही बाधा रे,
जूझत तोर पारा चल देहूं।
आज नहीं त काली रे चंदा,
बइंहा म तोला धर लेहूं।

मैं भारत अंव मोर भुजा के,
दुनिया लोहा मानत हे।
रेंगे रसता डिगे नहीं मोर,
बल बुध्दी सब जानत हे।
मोर उड़ान बिफल नै होही,
गगन पार फेर कर लेहूं।
आज नहीं त काली रे चंदा,
बइंहा म तोला धर लेहूं।

मैं तोर दिदार करहूं कहेंव,
तय मोला आगोश म ले डारे।
अउ लहुट के आहूं मय हा,
चाहे कोनो कुछू काहे।
बढ़ मुश्किल हे ये रसता,
मोर मंज़िल तोला बना लेहूं,
आज नहीं त काली रे चंदा,
बइंहा म तोला भर लेहूं। 🙏भारत माता की जय 🙏
-एमन दास मानिकपुरी
anjorcg.blogspot.com

गुरुवार, 5 सितंबर 2019

ये काफिले आने के और जाने के हैं
ज़िंदगी के चार दिन आजमाने के हैं
मौत के उसपार हकीकत की तस्वीर है
बांकी ये सब तो बस छलाने के हैं
-एमन दास मानिकपुरी
(anjorcg.blogspot.com)



दामन पे लगा दाग, कभी धुलता नहीं।
पत्थर की लकीर हवा में घुलता नहीं।
तू भूल जा बेशक, अपनी गुनाहों को।
मगर वो खुदा कभी भुलता नहीं ।
-एमन दास
(anjorcg.blogspot.com)