का हो ही

हुंकराय भुंकराय ले का होही
गजब  मेछराय  ले  का  होही

चाल  चलन  म किरा परे  हे
चेहरा चमकाय ले का होही

उंकर आंखी म सबो दिखत हे
तोर  लुकाय  ले  का  होही

मरनी के बेरा म करनी दिखथे
तब  पछताय  ले  का  होही

बिन मिहनत मिठाय नहीं कौरा
फोकट  अटियाय  ले  का होही

लच्छू ठेला म पगुरावत बैठे रा
कमाय  नै कमाय  ले का होही

कतको  कमाबे  पुर नै आवे
तोर जोरे बचाय ले का होही

मन मैलाहा निठुर चोला म
कातिक नहाय ले का होही

करिया नजर के आंखी करिया
काजर  अंजाय  ले  का  होही

करम धरम म जनम अलगागे
जीनगी अलगाय ले का होही

हरहा मरहा हमला तय जाने
अब जाने जनाय ले का होही

लकठा म आके बोले न बताए
दूरिहा से बलाय ले का होही

उलझे उलझाय लेथे जवारा

अब के तरसाय ले का होही

कोठा कुरिया खेतीखार नै झांके
जुच्छा हाथ हलाय ले का होही

— एमन दास मानिकपुरी
anjorcg.blogspot.com