चढ़ती जवानी
----------------
गजब मोहे टूरी तोर चढ़ती जवानी
बुढ़वा जवान के होगे पानी पानी

बिहनिया भरमना मंझनिया मनमानी
संझा लहुरे लहर रतिहा बदनामी

ऐसन कोन भाही बिपत के खानी
कुकुर गती होही काय के हैरानी

अंतस म आंसू तोर बाहिर मुस्कानी
घर के खेती परोसी के सियानी

जियलेवा रूप रंग कुंदरू कस चानी
देखे ले हाय राम जरय जिनगानी

परबुधिया बात जौने हा पतियानी
बिलहोरे संसो म पीटे परवा छानी

अलकरहा लिख डारेव अटपटहा बानी
सुरमिलहा कोनो कवि तौने चिनहे जानी

खपचलहा जिनगी होगे करू कानी
काया अइलागे माया मुटका मिठानी

अपने नै संभले दुसर काबर पीबो मानी
चेत चढ़े तभे तरे सुनौ पनिका के जुबानी

गीतांश
एमन दास मानिकपुरी

anjorcg.blogspot.com